Қазақстан мен БАӘ барлық бағыттағы өзара ынтымақтастықты нығайтты – Назарбаев

Күні: 18:40, 30-10-2014.

Астана. 30 қазан. ҚазТАГ – Елбасы Әбу-Дабидің мұрагер ханзадасы, Біріккен Араб Әмірліктері Қарулы күштерінің Жоғарғы бас қолбасшысының орынбасары Мұхаммед бен Заид Әл Нахайянмен кездесті, деп хабарлады ҚР президентінің баспасөз қызметінен.
«Кездесуде сауда-экономикалық, инвестициялық және мәдени-гуманитарлық салалардағы екіжақты қарым-қатынастардың басымдығы бар мәселелері қарастырылды», - делінген бейсенбі күнгі Ақорданың ресми сайында жарияланған хабарда.
Сонымен қатар, Нұрсұлтан Назарбаев пен Мұхаммед бен Заид Әл Нахайян өңірлік және халықаралық күн тәртібінің өзекті тұстарын талқылады.
Мемлекет басшысы Біріккен Араб Әмірліктерінің даму қарқыны жоғары екеніне назар аудара отырып, елдеріміздің арасындағы өзара іс-қимыл соңғы жылдары барлық негізгі бағыттар бойынша нығайғанын атап өтті.
Әңгіме барысында Таяу Шығыс елдерінің ішінде БАӘ-нің Қазақстандағы негізгі инвесторлардың бірі болып отырғаны да айтылды. Тығыз ынтымақтастықтың мысалдары ретінде Астанадағы көпфункционалды «Әбу-Даби Плаза» кешенінің құрылысын, «Al Hilal Bank» ислам банкі мен Қазақстандағы «Фалах» бірлескен инвестициялық қордың қызметін айтуға болады.


Жаңалықтармен бөлісу: