Астана. 18 маусым. ҚазТАГ – Қазақстанда демалыс күндері коронавирус салдарынан қосымша шектеу шаралары енгізіледі, деп хабарлады ҚР премьер-министрінің баспасөз қызметінен.
«Қазақстанның бірқатар өңірінде эпидемиологиялық жағдайдың өршуін және коронавирус инфекциясымен ауыру көрсеткішінің артуын ескере отырып, ВАК биылғы 20-21 маусым, демалыс күндеріне, мынадай қосымша шектеу шараларын енгізу туралы шешім қабылдады», - делінген бейсенбідегі хабарда.
Нұр-Сұлтан, Алматы, Қарағанды, Шымкент, Павлодар, Екібастұз қалалары бойынша:
сауда ойын-сауық орталықтарының, сауда үйлерінің, желілік дүкендердің, жабық азық-түлік және басқа да базарлардың қызметі тоқтатылады;
қоғамдық тамақтану орындары тек далада әрі әлеуметтік арақашықтықты сақтап қана жұмыс істеуі тиіс;
қоғамдық көліктердің қызметі шектеледі;
қоғамдық демалыс орындары: парктер, саябақтар, жағалаулар, жағажайлар, аквапарктер қызметі тоқтатылады;
фитнес-орталықтарының қызметі тоқтатылады;
65 жастан асқан адамдардың далаға шығуы шектеледі.
Тұрғындарының саны 50 мыңнан асатын елді мекендер бойынша:
қоғамдық орындардың: парктер, саябақтар, жағалаулар, жағажайлар, аквапарктер жұмысы тоқтатылады;
65 жастан асқан адамдардың далаға шығуы шектеледі.
«Өңірлердің бас санитарлық дәрігерлерінің қаулыларына сәйкес, Нұр-Сұлтан, Алматы, Қарағанды, Шымкент, Павлодар және Екібастұз қалаларына аумақтық жақын орналасқан туристік аймақтарға кіруге тыйым салу, ал аталған аймақтардағы адамдарға әлеуметтік қашықтықты сақтау қажет», - делінген хабарда.
Үкімет басшысы өңірлердің әкімдіктеріне қысқа мерзім ішінде мына мәселелерді пысықтауды тапсырды:
медициналық ұйымдар базасында қосымша зертханалар ашу арқылы халықты ПТР-тестілеумен қамтуды кеңейту;
ауруханаларда инфекциялық және провизорлық орындар санын көбейту;
меншік нысанына қарамастан, өңірде бар ресурстарды тарта отырып, науқастарды КТ-зерттеумен қамтамасыз ету;
жедел медициналық жәрдем станцияларының шұғыл және кезек күттірмейтін шақыруларға уақытылы қызмет көрсетуін қамтамасыз ету;
үйлерінде жатқан пациенттерге амбулаторлық-емханалық көмек деңгейінде сапалы динамикалық бақылау жасау (қашықтан, мобильді бригадалардың көмегімен);
халыққа белсенді ақпараттық-түсіндіру жұмыстарын жүргізу.
Еске салсақ, 17 маусымда Қазақстан президенті Қасым-Жомарт Тоқаев эпидемиологиялық жағдайды тұрақтандыру бойынша министрлер кабинетінің шаралар қабылдайтынын айтқан еді. Ол азаматтардың карантин режимін жаппай сақтамауына байланысты коронавирустың көбейіп кеткенін, дегенмен жағдайдың үкіметтің бақылауында екенін айтты.
Қазақстанда демалыс күндері коронавирус салдарынан қосымша шектеу шаралары енгізіледі
