Мұнай-газ машина жасау саласын дамыту жөніндегі халықаралық орталық құруға қатысты ниет туралы келісімге қол қойылды

Күні: 17:23, 30-11-2020.

Астана. 30 қараша. ҚазТАГ - “ТЕҢІЗШЕВРОЙЛ” ЖШС, “Норт Каспиан Оперейтинг Компани Н.В.” және “Карачаганак Петролиум Оперейтинг Б.В.” (бұдан әрі - Операторлар) компаниялары Мұнай-газ машинасын жасауды дамытудың халықаралық орталығын (бұдан әрі - Халықаралық орталық) құруға қатысты ниет туралы келісімге қол қойылғанын жариялады. Қазақстан Республикасы тарапынан құжатқа Индустрия және инфрақұрылымдық даму министрлігі, Энергетика министрлігі, Өкілетті орган («PSA» ЖШС) және Қазақстанның машина жасаушылар одағы қол қойды.

Бұл құрылым республика аумағында мұнай-газ саласына арналған тауарлар өндірісін дамытуды кеңейту, сондай-ақ қазіргі кезде шетелден жеткізілетін жабдықтар мен материалдардың импортын алмастыру мақсатында Қазақстан Республикасы Үкіметінің бастамалары шеңберінде және ірі мұнай-газ операторларының қолдауымен құрылмақ. Отандық мұнай-газ саласының машина жасау өнеркәсібін дамыту шеңберінде Халықаралық орталық тиісті министрліктермен, Өкілетті органмен және мұнай және газ саласының қауымдастықтарымен тығыз әрекеттесетін болады.

Халықаралық орталықтың негізгі қызметі Қазақстан Республикасында тауарлар өндірісін дамыту мен техникалық стандарттарды бейімдеу арқылы өндірістік қуаттарын жаңартуда қазақстандық өндірушілерге жәрдем көрсетуге бағытталған.

Халықаралық орталық өз қызметін коммерциялық емес шығынсыз негізде ірі Операторлардың қолдауымен жүзеге асырмақ.


Жаңалықтармен бөлісу: