ОҚО-да күшті дауыл 300 үйдің шатырын жұлып, жүздеген ағашты құлатты

Күні: 14:04, 15-06-2016.

Алматы. 15 маусым. ҚазТАГ – Оңтүстік Қазақстан облысында күшті дауыл 300 үйдің шатырын жұлып кетті, деп хабарлады облыстық әкімшіліктен.
Әкімшіліктің ресми сайтында жарияланған хабарда айтылғандай, бүгін өңір басшысы Б.Атамқұлов пен ОҚО ТЖД бастығы А.Путейко Отырар ауданында болып, кеше түнде қатты желдің салдарынан зақымданған нысандардың жағдайымен танысты.
Оқиға орнында жүрген арнайы жұмыс тобы мұнда тұрғын үйлер мен 4 мектеп, 1 балабақшаның, сонымен қатар, Маяқұм ауылындағы №30 жекелеген өрт сөндіру бекетінің шатыры ұшып, ғимараттарға айтарлықтай зиян келгенін анықтады. Ал Түркістан қаласы мен Бәйдібек ауданындағы 1 нысанға қатты зиян келгені белгілі болды.
Табиғаттың тосын мінезінен болған оқыс оқиғаның салдарына куә болған аймақ басшысы жауапты сала мамандарына жеке тұрғын үйлердің шығындарын тіркеуге алып, істі бақылауға алу арқылы жергілікті халыққа барынша жағдай жасау керектігін тапсырды.
Еске салайық, кеше, 14 маусым күні сағат 22:30-23:25 аралығында ОҚО аумағында жылдамдығы 25-30 метр болатын күшті жел Отырар, Бәйдібек аудандары мен Түркістан қаласындағы 300-ден астам тұрғын үйлер мен әлеуметтік нысандардың шатырын ұшырып, ағаш және электр бағаналарына зиян келтірген болатын.
ОҚО ТЖД мамандарының алдын ала мәліметінше, күшті желден толық немесе жартылай ғимараттардың шатырлары ұшып кеткен. Атап айтқанда, тұрғын үйлерге, мектептер мен мектепке дейнгі мекемелерге, емдеу мекемелері мен мемлекеттік мекемелерге, коммерциялық объектілерге, ағаш және электр бағаналарға зиян келтірілген.
«Қазгидромет» орталығы мамандарының болжамынша, мұндай ауа райы өңірде әлі екі күнге созылады.


Жаңалықтармен бөлісу: