Президент Асанәлі Әшімовты «Атаманның ақыры» фильмінің 50 жылдығымен құттықтады

Күні: 19:25, 16-11-2020.

Астана. 16 қараша. ҚазТАГ – Қазақстан президенті Қасым-Жомарт Тоқаев қазақстандық кинематография ардагері Асанәлі Әшімовты «Атаманның ақыры» фильмінің 50 жылдығымен құттықтады, деп хабарлады Ақорда баспасөз қызметінен.
«Қазақстан Президенті Қасым-Жомарт Тоқаев кино және театр өнерінің майталман актері, Халық әртісі, Қазақстанның Еңбек Ері Асанәлі Әшімовті миллиондаған көрерменнің ықыласына бөленген «Атаманның ақыры» көркем фильмінің түсірілгеніне 50 жыл толуына орай құттықтады. Мемлекет басшысы дарынды режиссер Шәкен Аймановтың және үлкен шығармашылық ұжымның бірлескен күш-жігерінің арқасында өмірге келген бұл туындының отандық кино өнері саласында алатын орны айрықша екенін атап өтіп, оны детектив жанрында түсірілген алғашқы фильмнің бірі деп бағалады», - делінген дүйсенбідегі хабарда.
Президенттің құттықтау хатында «Атаманның ақыры» фильмі тарихи деректерге негізделген шытырман оқиғаларға толы екені, сол заманның өскелең ұрпағын отансүйгіштікке, елді қорғау үшін жанқиярлықпен күресуге тәрбиелегені туралы айтылған.
«Өзіңіз аталған кинотуындыда чекист Қасымхан Шадияров рөлін өте ғажап сомдап шықтыңыз. Арпалысқа түскен қоғамда жауапты қызметкердің өзіне жүктелген құпия тапсырманы орындау жолындағы батырлық пен қайсарлық танытқан іс-әрекетін шынайы көрсете білдіңіз. Сізді аса көрнекті актер ретінде КСРО ғана емес, бүкіл әлемдік кинематография қауымдастығы мойындады. Сонымен қатар қазақстандық әйгілі әртістер Елубай Өмірзақов, Нұрмұхан Жантөрин және Алтынай Елеуова да өздері сомдаған рөлдерін үлкен шеберлікпен орындай білді», - делінген Тоқаевтың құттықтау хатында.
Мемлекет басшысы Халық әртісіне алдағы уақытта да отандық кино мен театр өнерін және халқымыздың рухани байлығын дамыту жолына өз үлесін қосып, елдің айрықша құрметіне бөлене беруіне тілектестік білдірген.
«Құттықтау соңында Қасым-Жомарт Тоқаев Асанәлі Әшімовке зор денсаулық, ұзақ ғұмыр, отбасына құт-береке тіледі», - деді Ақорда.
«Атаманның ақыры» экранға 1970 жылы шықты. Фильм Түркістан мен Қытайдың Синьцзян-Ұйғыр ауданындағы 1920-1921 жылдардағы тарихи жағдайлар туралы баяндайды.


Жаңалықтармен бөлісу: