ҚР Еңбек және халықты әлеуметтік қорғау министрлігінің қызметкерлері біркүндік жалақыларын су тасқынынан зардап шеккендерге көмекке аударды

Күні: 16:49, 10-05-2017.

Астана. 10 мамыр. ҚазТАГ - ҚР Еңбек және халықты әлеуметтік қорғау министрлігінің және ведомствоға қарасты ұйымдардың қызметкерлері біркүндік жалақыларын Ақмола, Ақтөбе, Қарағанды, Қостанай және Қостанай облыстарының су тасқынынан зардап шеккен тұрғындарына көмек қорына аударды, деп хабарлады ҚР еңбек және алықты әлеуметтік қорғау министрлігінің баспасөз қызметінен.
Қаражат келесі қоғамдық қорлардың арнайы есепшоттарына аударылды: Қазақстан халқы Ассамблеясы Ақмола филиалының жанындағы «Қазақ тілі мен мәдениеті», «Қолғанат Ақтөбе» (Ақтөбе облысы), «Туған елім» (Қарағанды облысы), “Милосердие-Қостанай” (Қостанай облысы) және “Қазақстан Республикасының ардагерлер ұйымы” республикалық қоғамдық бірлестігінің Ғ.Мүсірепов атындағы филиалы (Солтүстік Қазақстан облысы).
Табиғаттың тосын мінезінен жапа шеккен отандастарымызға қолдау көрсетуге министрліктің орталық аппаратында, Мемлекеттік әлеуметтік сақтандыру қорында, Мемлекеттік аннуитеттік компанияда, Еңбек қорғау жөніндегі республикалық ғылыми-зерттеу институтында және  “Біліктілікті көтеру курстары” мемлекеттік мекемесінде істейтін 300 қызметкер ниет білдірді.
Жоғарыда аталған қорларға жіберілген қаржының жалпы сомасы 5,1 миллион теңгеден асты.
Көктемгі су тасқынынан зардап шеккендерге арналған қаражаттың барлығы киім мен азық-түлік сияқты алғашқы қажеттілік заттарын алуға жұмсалмақ.


Жаңалықтармен бөлісу: