Тасмағамбетов қаза болған әскери қызметкерлердің ата-аналарына мемлекеттік сыйлықтар табыс етті

Астана. 15 желтоқсан. ҚазТАГ – Астанада ҚР Қорғаныс министрі Иманғали Тасмағамбетов ағымдағы жылдың қыркүйегінде «Центр-2015» жаттығуы барысында әскери міндетін орындау кезінде қайтыс болған әскери қызметшілердің ата-аналарына мемлекеттік наградалар табыстады, деп хабарлады ҚР қорғаныс министрлігінің баспасөз қызметінен.
«Бүгін Елбасы – ҚР ҚК Жоғарғы Бас Қолбасшысының арнайы Жарлығымен Отаны мен халқы алдында өз борышын орындай отырып, батылдық танытып, опат болған сарбаздар марапатталады. Бұл есімдері мәңгі жадымызда қалатын айбынды әскери қызметшілерімізді құрметтеу белгісі. Мақсатымыз медальдарды табыстау ғана емес, сонымен бірге қайғыларыңызға ортақ болу болып табылады. Әрине, анасы мен әкесіне қаза болған ұлдарын ешбір марапат қайтара алмайды. Біз оны жақсы түсінеміз.  Алайда, өзгелерге үлгі-өнеге болып табылатын сарбаздың батылдығының маңыздылығын, Отан қорғаушысының абыройын, әскери қызметшінің бейнесін ешкім жоққа шығара алмайды.  Бұл медальдар жұбаныш болып табылмайды, бірақ, мақтауға тұрарлық ұл тәрбиелеп өсірген ата-аналар үшін нағыз халықтың сый-құрметі іспетті», - деді ҚР Қорғаныс министрі Иманғали Тасмағамбетов. Қаза болғаннан кейін ұлан қатардағы жауынгері Асылжан Махамбетов, ұлан қатардағы жауынгері Замир Әділов, ұлан қатардағы жауынгері Бауыржан Жолдыбай және ұлан қатардағы жауынгері Бағытжан Қалыбай «Ерлігі үшін» медальдарын иеленді.   Естеріңізге сала кетсек, қайғылы оқиға Ақтауда 18 қыркүйекте «Орталық-2015» оқу-жаттығуының 2-кезеңін өткізу кезінде орын алды. Оқу-жаттығу барысында 4 әскери қызметші суға батып кетті. Бүгінгі күні тергеу әлі жалғасуда.