Қазақстанның сыртқы борышы $159 млрд. құрады

Күні: 18:44, 05-04-2019.

Алматы. 5 сәуір. ҚазТАГ – Қазақстан Республикасының сыртқы борышы 159 млрд. АҚШ долл. құрады, деп хабарлады Ұлттық банктің баспасөз қызметінен.
«2019 жылғы 1 қаңтардағы жағдай бойынша Қазақстан Республикасының сыртқы борышы 158,8 млрд. АҚШ долл. немесе ІЖӨ-ге қатынасы 93,1% (жыл басынан бастап 9,5%-ға жақсарып) құрады», - делінген жұмада таратылған хабарда.
Сыртқы борыш құрылымында 63,6%-ын бұрынғысынша фирмааралық берешек, 25,0% байланысты емес кредиторлар алдындағы «Басқа секторлардың» сыртқы борышы, 7,8% мемлекеттік сыртқы борыш (Үкімет пен Ұлттық Банк), 3,6% - «Банктер» секторының сыртқы міндеттемелері (ЕДБ және «Қазақстанның Даму Банкі» АҚ) алып отыр.
«2018 жылғы 4-ші тоқсанда экономиканың банктік емес секторы міндеттемелерінің азаюы есебінен елдің сыртқы борышы 2,5 млрд. АҚШ долл. қысқарды. Мемлекеттік сыртқы борыш жалпы сомасы 1,05 млрд. еуроны құрайтын 5 және 10- жылдық тәуелсіз еурооблигациялардың екі траншын шығару есебінен 899,1 млн. АҚШ долларына өсті», - деді қаржылық реттеуші.
Хабарда атап өтілгендей, «Банктердің» сыртқы міндеттемелері тоқсан ішінде өзгермеді, себебі бейрезиденттердің қолындағы еурооблигациялар көлемінің азаюы олардың қазақстандық банктердегі депозиттерінің өсуімен өтелді.
«Басқа секторлардың» үлестес емес кредиторлар алдындағы сыртқы борышы 1,6 млрд. АҚШ долларына азайды, ол, негізінен, қарыздарды өтеу есебінен, оның ішінде ERG тобы кәсіпорындарының міндеттемелерін қайта қаржыландыру (963 млн. АҚШ долларына азаю), «ҚазМұнайГаз» ҰК» АҚ-тың «Сбербанк России» ПАО алдындағы (371 млн. АҚШ долл.) және «Қазтеміртранс» АҚ-тың ЕҚДБ алдындағы қарыздарын өтеу есебінен орын алды», - деді Ұлттық банктен.
Фирмааралық берешек ірі кен өндіруші және көліктік компаниялардың шетелдік тел ұйымдардан тартылған несиені өтеуі нәтижесінде 1,8 млрд. АҚШ долл. қысқарды.
«Талдамалық мақсатта сыртқы борыш құрылымында есепті кезеңде 1,2 млрд. АҚШ долларына азайып, 2019 жылғы 1 қаңтарда 22,8 млрд. АҚШ долл. құрған мемлекет бақылайтын ұйымдардың сыртқы борышы (мемлекеттік сектор капиталына 50%-дан астам тікелей немесе жанама қатысатын банктер мен ұйымдар) жеке көрінеді», - деп атап өтті қаржылық реттеуші.
Қазақстан Республикасының таза сыртқы борышы 2018 жылғы 4-тоқсанда 560,5 млн. АҚШ долларына азайып, 47,2 млрд. АҚШ долларын құрады.
«Бұл ретте мемлекеттік сектор және «Банктер» қалған әлемге қатысты таза кредиторлар болып, ал «Басқа секторлар» таза қарыз алушылар болып табылады», - деп түсіндірді Ұлттық банктен.



Жаңалықтармен бөлісу: