«Қолжетімді баспана» бағдарламасы бойынша Түркістанда 140 отбасы пәтер алды

Шымкент. 21 қазан. ҚазТАГ - «Қолжетімді баспана-2020» бағдарламасы бойынша Түркістанда 140 отбасы пәтер алды, деп хабарлады Оңтүстік Қазақстан облысы әкімдігінің баспасөз қызметінен.
«Түркістанда «Қолжетімді баспана-2020» бағдарламасы бойынша 140 отбасы баспаналы болды. Оларға екі көпқабатты үйлердегі пәтерлердің кілттері табысталды», - делінген сейсенбідегі хабарда.
Әкімдік ақпарынша, жаңадан қоныстанушылардың бірқатары 60 пәтерлі үйге орналасса, қалғаны 80 пәтерлі үйге орналасты.  
Жаңа үйлердің құрылысына облыстық бюджеттен Т633 млн теңге бөлінген.  
Баспасөз қызметінің ақпарынша, Түркістанда үй кезегінде 1,5 мың адам тұр.
«Оларды пәтерлермен қамтамасыз ету үшін қаланың шығыс жағында жаңа ықшам аудан салу жоспарлануда. Жобалық-сметалық құжаттамасын дайындап та қойдық. Егер қаржыландыру болса, онда келесі жылы бес көпқабатты үйдің құрылысы басталады», - деді әкімдікте.