«Астана банкінің» топ-менеджері мемкәсіпорын шотынан Т160 млн жымқырған

Күні: 12:26, 04-06-2019.

Астана. 4 маусым. ҚазТАГ – «Астана банкі» АҚ топ-менеджері Ерлан Увалеев мемкәсіпорын шотынан Т160 млн жымқырған, деп хабарлады ҚР қаржы министрлігі қаржылық мониторинг комитетінің баспасөз қызметінен.
«ҚР Қаржы министрлігі Қаржы мониторингі комитетінің Экономикалық тергеу қызметі Әділет министрлігіне қарасты Республикалық құқықтық ақпарат орталығының шотынан 160 млн теңге қаражатты жымқыру фактісін әшкереледі. «Астана Банкі» АҚ-ның басқармасы төрағасының орынбасары Е.Ж.Увалеев 2012 жылдың қазан айында Республикалық құқықтық ақпарат орталығының атынан төлем тапсырмасын қолдан жасап, ұрланған қаражатты өзіне бағынышты компанияның шотына аударған», - делінген сейсенбіде таратылған хабарда.
Хабарда атап өтілгендей, аталған қылмысты 6 жыл бойы жасыруға сол банктің менеджері А.Х.Жундугулова көмектесіп келген. Ол ай сайын Республикалық құқықтық ақпарат орталығының бухгалтериясына олардың шоты бойынша жалған мәліметтер беру арқылы мемлекеттік кәсіпорнында өзіне қатысты жасалған алаяқтық туралы білуіне мүмкіншілік болмаған.
«Тергеу барысында күдіктілер өз кінәларын мойындап, келген шығындар көлемін толықтай өтеді. Тергеу барысында күдікті Е.Ж.Увалеев соттың санкциясымен қамауда болды. Нұр-Сұлтан қаласының №2 Сарыарқа аудандық сотының үкімімен Е.Ж.Увалеев пен А.Х.Жундугулова кінәлі ретінде танылып, қылмыстық жауапқа тартылған», - делінген хабарда. Астана


Жаңалықтармен бөлісу: