Қазақстан аумағы арқылы Ресейге түркімен газының транзиті қайта басталды

Күні: 13:33, 03-05-2019.

Астана. 3 мамыр. ҚазТАГ – Қазақстан аумағы арқылы Ресейге түркімен газының транзиті қайта басталды, деп хабарлады «ҚазТрансГаз» (ҚТГ) АҚ баспасөз қызметінен.
«Ұлттық газ операторы «ҚазТрансГаз» АҚ «Орта Азия - Орталық» магистральдық газ құбыры бойынша Ресей Федерациясына Қазақстан Республикасының аумағы арқылы түркімен тауарлық газын транзиттеуді қайта бастады. «ҚазТрансГаз» АҚ қысқа мерзім ішінде магистральдық газ құбырлары жүйесі арқылы транзитті қайта жаңғыртуға қажет шараларды жүзеге асырды. Заманауи технологиялардың және «Орта Азия - Орталық» магистральдық газ құбырында жүргізілген модернизация жұмыстарының арқасында маршруттық бағыттар әртараптандырылды және бірнеше тәулік ішінде тасымалдау режимі қалыпты жұмысқа қосылды», - делінген жұмада таратылған хабарда.
ҚТГ нақтылағандай, «Орта Азия - Орталық» магистральдық газ құбыры бойынша Ресей Федерациясына түркімен газын тасымалдау көлемі тәулігіне 15 млн. текше метрді құрайды.
«Қазақстан аумағы арқылы транзитті қайта бастаған сәттен бері 220 млн. текше метрден астам газ тасымалданды», - деді ұлттық оператор.
Қазақстанның газ тасымалдау жүйесі арқылы түркімен газының транзиті 2016 жылдан бастап тоқтатылған болатын.
2019 жылдың басында Түркіменстан мен Ресей Федерациясының арасында газ саласындағы 2028 жылға дейінгі ынтымақтастық жөніндегі қолданыстағы үкіметаралық келісім шеңберінде газды жеткізуді қайта қолға алу туралы уағдаластық жасалды.
«Бұл бірден үш мемлекетке газ саласында өзара тиімді ынтымақтастықты қалыптастыруға мүмкіндік берді», - деп атап өтті ҚТГ.


Жаңалықтармен бөлісу: