Астана. 6 желтоқсан. ҚазТАГ – Премьер-министрдің орынбасары – Қазақстан сыртқы істер министрі Мұрат Нұртілеу Мальтада ЕҚЫҰ Сыртқы істер министрлері кеңесінің (СІМК) 31-ші отырысына қатысып, ұйымды қазіргі кездегі жаңа қауіпсіздік архитектурасына бейімдеуге шақырды, деп хабарлады сыртқы істер министрлігінің баспасөз қызметінен.
«ЕҚЫҰ негізгі құжаты – 1975 жылғы Хельсинки қорытынды актісінің 50 жылдығы қарсаңында Қазақстан СІМ басшысы оның қағидаттарын, сондай-ақ 2010 жылы ЕҚЫҰ саммитінің қорытындылары бойынша қабылданған Астана декларациясының ережелерін мүлтіксіз сақтау қажеттігін атап өтті. Ол сондай-ақ әріптестерін Ұйымды қазіргі кездегі жаңа қауіпсіздік архитектурасына бейімдеуге шақырды», - делінген хабарда.
Кездесуге қатысушылардың алдында сөйлеген сөзінде Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу «Хельсинки рухын» жандандыру қажеттігін мәлімдеп, ЕҚЫҰ-ны қауіпсіздік мәселелері бойынша инклюзивті диалог үшін бірегей платформа ретінде сақтаудың маңыздылығын атап өтті. М.Нұртілеу климаттың өзгеруіне қарсы күресте күш-жігерді бірлесіп жұмсауды, қатысушы елдерді 2026 жылы Қазақстанда өтетін БҰҰ Өңірлік климаттық саммитіне қатысуға шақырды.
Шараға 57 елдің сыртқы саяси ведомстволарының басшылары қатысты.
Іс-шара барысында қатысушы мемлекеттер 2024 жылы Мальта төрағалығымен Ұйымның жұмыс қорытындыларын тыңдады, ЕҚЫҰ кеңістігіндегі қауіп-қатерлерге қарсы іс-қимыл мәселелерін, сондай-ақ күрделі геосаяси жағдай аясында Ұйымда қалыптасқан институционалдық дағдарысты еңсеру жолдарын талқылады.
Іс-шара аясында ҚР Сыртқы істер министрі М.Нұртілеу Әзербайжан Сыртқы істер министрі Джейхун Байрамов, Бельгия Сыртқы істер министрі Бернард Кентен, Грузия Сыртқы істер министрі Мака Бочоришвили, Люксембург Сыртқы істер министрі Ксавье Беттель, Словакия Сыртқы істер министрі Юрай Бланар, Түркия Сыртқы істер министрі Хакан Фидан мен Финляндия Сыртқы істер министрі Элина Валтоненмен екіжақты кездесулер өткізді.
Қазақстан 1992 жылдан бастап ЕҚЫҰ-ға қатысушы мемлекет. 2010 жылы еліміз ЕҚЫҰ-ға төраға болып, Астана декларациясының қабылдануымен аяқталған саммит өткізді.
Қазақстан ЕҚЫҰ қазіргі кездегі жаңа қауіпсіздік архитектурасына бейімдеуге шақырды
