Қазақстанда 120 медқызметкер коронавирус жұқтырды, біреуінің жағдайы – ауыр

Астана. 6 сәуір. ҚазТАГ – Махамбет Әбжан. Қазақстанда 120 медқызметкер коронавирус жұқтырды, біреуінің жағдайы – ауыр, деді ҚР бас мемлекеттік санитарлық дәрігері Айжан Есмағамбетова.
«Бүігнгі таңда медқызметкерлер арасында 120 жағдай тіркеліп отыр. Оның ішінде 67 жағдай коронавирус жұқтырғандарға немесе сондай күдікке іліккендерге тікелей медициналық көмек көрсеткен медқызметкерлер арасынан шығып отыр. Медқызметкерлердің жағдайы – біреуінің жағдайы ауыр, 7% немесе тоғыз адамның жағдайы орташа ауыр, қалған 57 адам – аурудың жеңіл немесе белгісіз түріне шалдыққан», - деді Есмағамбтова дүйсенбіде ОКҚ-нен.
Естеріңізге сала кетейік, 2019 жылдың желтоқсан айының соңында Қытайда этиологиясы белгісіз пневмония ауруы тіркелді. Соңғы мәліметтерге сәйкес, COVID-19 коронавирусынан туындаған пневмониямен ауыратын науқастардың жалпы саны жүздеген мыңнан асса, қайтыс болғандар ондаған мыңнан астам.
2020 жылдың 30 қаңтарында Қазақстан Қытайға автобус қатынасын (29 қаңтардан бастап), жолаушылар пойыздарын (1 ақпаннан) және әуе қатынасын (3 ақпаннан) тоқтататындығы белгілі болды. 6 ақпанда «Қазпошта» Қытаймен пошталық байланысты тоқтатты. 1 наурыздан бастап Қазақстан Оңтүстік Корея және Иранмен әуе тасымалын қысқартты.
Сондай-ақ, коронавирус Венгриядағы қазақстандықтан да табылды.
15 наурызда Қазақстан президенті Тоқаев 16 наурыздан бастап Қазақстанда төтенше жағдай жариялау туралы өкім етті.
17 наурызда ҚР президенті жанындағы ТЖ режимін қамтамасыз ететін Мемкомиссия Нұр-Сұлтан мен Алматы қалаларында 19 наурыз сағат 00.00-ден бастап карантин режимін енгізді. Соған байланысты азаматтар мен көліктердің кіруіне және шығуына шектеу енгізілген. 28 наурыздан бастап Нұр-Сұлтан мен Алматыда және Шымкентте карантин шаралары күшейтілді.
Бүгінгі таңда Қазақстанда коронавирусты жұқтырудың 604 жағдайы тіркеліп, 45-і жазылып, алты адам көз жұмған еді.

adimage