Барлық делегация Нұр-Сұлтанға келді және Сирия жөніндегі келіссөздер басталды – СІМ

Күні: 12:14, 01-08-2019.

Астана. 1 тамыз. ҚазТАГ – Сирия жөніндегі келіссөздерге қатысушылардың барлығы Нұр-Сұлтанға келді және келіссөздер басталды, деп хабарлады ҚР СІМ ресми өкілі Айбек Смадияров.
«Сирия жөніндегі жоғары деңгейдегі халықаралық кездесудің кезекті XIII раундына қатысушы барлық делегация Нұр-Сұлтанға келіп, келіссөздер басталды», - деді Смадияров бейсенбіде.
Бұған дейін хабарланғандай, 31 шілдеде Нұр-Сұлтанға Сирия жөніндегі келсісөздерге қатысуға шақырылғандардың барлығы қатысатындарын растаған еді.
Сыртқы саяси ведомство атап өткендей, Ресей делегациясын РФ Президентінің Сирия жөніндегі арнайы өкілі Александр Лаврентьев, Түркия делегациясын ТР сыртқы саяси ведомство басшысының орынбасары Седат Онал басқарады. Иран делегациясына Сыртқы істер министрінің саяси істер жөніндегі жоғары көмекшісі Али Асгар Хаджи басшылық етеді.
Сонымен бірге, аталған кездесуге Сириядағы екі қақтығысушы тарап – Сирияның БҰҰ-дағы Тұрақты өкілі Башар әл-Джаафари бастаған САР үкіметтік делегациясы және Ахмад аль-Тоума бастаған қарулы оппозиция қатысады.
«Кездесудің жаңалығы - Астана форматындағы бұған дейінгі келіссөздер негізінде қабылданған шешімге сәйкес, Ирак пен Ливан делегацияларының аталған процеске байқаушылар ретінде қатысуы. Өкінішке орай, БҰҰ Бас хатшысының Сирия жөніндегі арнайы өкілі Гейр Педерсен денсаулығына байланысты алдағы келіссөздерге қатыса алмайтын болады. БҰҰ делегациясын оның орынбасары басқарады», - деді Қазақстанның сыртқы істер министрлігінен.
Бұған қоса, осы күндері сирияаралық келіссөздер шеңберінде өтетін Тұтқындарды босату, қаза тапқандардың денелерін табыстау және із-түзсіз жоғалғандарды іздестіру бойынша жұмыс тобының кезекті кездесуіне қатысу үшін БҰҰ Босқындар істері жөніндегі жоғарғы комиссары басқармасы және Халықаралық Қызыл Крест Комитетінің өкілдері Нұр-Сұлтанға келеді.
«Бұрын өткен сирияаралық келіссөздерге ұқсас, бірінші күні «жабық есік» жағдайында екіжақты және көпжақты техникалық консультациялар, ал келесі күні жалпы отырыс өтеді. Екі күндік келіссөздердің негізгі нәтижелері Астана процесінің кепілгер мемлекеттерімен қабылданатын Бірлескен мәлімдемесінде баяндалады», - делінген хабарда.



Жаңалықтармен бөлісу: