Белгісіз біреулер Петропавл қаласының тұрғынына оқ атқан, ер азамат ауыр халде ауруханаға жатқызылған

Күні: 18:50, 27-08-2019.

Петропавл. 27 тамыз. ҚазТАГ - Белгісіз біреулер Петропавл тұрғынын атып кетті, ер адам ауыр халде ауруханаға түсті, деп хабарлайды агенттік тілшісі.
«Аяққа оқ тиген, ер адамның жағдайы ауыр. Дәрігерлер оның өмірі үшін күресуде», - деді сейсенбіде Солтүстік Қазақстан облыстық ауруханасының бас дәрігері Юрий Белоног.
СҚО полиция бөлімінің (ДП) баспасөз қызметінде көрсетілгендей, оқиға 26 тамызда қала орталығында, Жұмабаев көшесіндегі № 98 үйдің ауласында болған.
«26 тамызда сағат 4.00 шамасында екі белгісіз адам Петропавл тұрғынының аяғынан атып кетті. Жәбірленуші облыстық ауруханаға жеткізілді. Оқиғаның мән-жайын анықтау және қылмыстың заттай айғақтарын жинау үшін жедел-іздестіру шаралары мен тергеу амалдары жүргізілуде», - деп түсіндірді СҚО ДП-нің баспасөз қызметінде.
Сотқа дейінгі тергеу Қазақстан Республикасы Қылмыстық кодексінің 293-бабының 3-бөліміне (бұзақылық) сәйкес жүргізілуде.


Жаңалықтармен бөлісу: