Назарбаевқа ШҚО әлеуметтік-экономикалық дамуы туралы баяндалды

Күні: 13:32, 29-01-2019.

Астана. 29 қаңтар. ҚазТАГ – Шығыс Қазақстан облысының әкімі Даниал Ахметов Қазақстан президенті Нұрсұлтан Назарбаевқа өңірдің әлеуметтік-экономикалық даму барысы туралы есеп берді, деп хабарлады мемлекет басшысының баспасөз қызметінен.
«Кездесуде Мемлекет басшысына өңірдің әлеуметтік-экономикалық даму барысы туралы есеп берілді. Нұрсұлтан Назарбаев облыс тұрғындарының әл-ауқатын арттырудың маңыздылығын атап өтіп, аймақтағы бірқатар экономикалық көрсеткіштердің оң қарқынмен өсіп келе жатқанын айтты», - деп хабарлады сейсенбіде Ақордадан.
Қазақстан Президенті «Рухани жаңғыру» және облыстың туристік әлеуетін дамыту бағдарламаларын сапалы іске асыру қажеттігіне баса назар аударды.
«Жалпы, ішкі өңірлік өнім көлемі 104 пайызға артты. Өсім деңгейі өнеркәсіп саласында 118 пайызға, ауыл шаруашылығы бойынша 107 пайызға жетті. Көздеген көрсеткіштердің бәріне қол жеткізіп келеміз», - деді Д. Ахметов.
Сонымен қатар, Д.Ахметов Мемлекет басшысына өңірдегі денсаулық сақтау саласы бойынша халыққа қызмет көрсету сапасын арттыру үшін қабылданып жатқан шаралар туралы мәлімдеді.
«2015 жылы онкология, кардиология, ана мен бала, травматология сияқты 4 бағыттың қажетті құрал-жабдықтармен қамтамасыз етілуін анықтау мақсатымен денсаулық сақтау саласына талдау жасадық. Сонымен қатар, дәрігерлер даярлаудың үш деңгейлі жүйесін әзірледік. Бұл Семей қаласындағы Мемлекеттік медицина университетінде білім беру, шеберлік сыныптарын өткізіп, шетелде оқыту ісін қамтитын болады. Біз осы жұмысты одан әрі жалғастыра береміз», - деп мәлімдеді әкім.
Д.Ахметов білім беру, ауыз сумен қамту, жаңа тұрғын үйлер салу және елді мекендерді абаттандыру салаларында атқарылып жатқан жұмыстар жөнінде айтты.
«Кездесу соңында Мемлекет басшысы бірқатар нақты тапсырма берді», - делінген хабарда.


Жаңалықтармен бөлісу: