Назарбаев елорда тұрғындарын қолжетімді әлеуметтік нысандармен қамтудың маңыздылығына тоқталды

Күні: 12:01, 24-09-2018.

Астана. 24 қыркүйек. ҚазТАГ – 23  қыркүйек күні Қазақстан президенті Нұрсұлтан Назарбаев елорда тұрғындарын қолжетімді әлеуметтік нысандармен қамтудың маңыздылығына тоқталды,  деп хабарлады мемлекет басшысының баспасөз қызметінен.  
«Мемлекет басшысы елорда тұрғындарының тұрмысы үшін қолайлы жағдай жасаудың әлеуметтік маңызы жоғары екеніне тоқталып, қала құрылысында кешенді әдіс қолданудың қажеттігін атап өтті. Сонымен қатар қала халқын қолжетімді әлеуметтік нысандармен, соның ішінде білім беру және денсаулық сақтау мекемелерімен қамтамасыз етудің маңыздылығын айтты», - делінген сенбіде таратылған хабарда.  
Қазақстан Президентіне Астана қаласын одан әрі дамытудың және тұрғын үй алаптарында құрылыс жүргізудің жоспары таныстырылды.    
«Елбасы шаһарды көгалдандыру, қалада көлік қатынасын оңтайландыруға мүмкіндік беретін автотұрақтар мен жолайрықтар салу мәселелеріне назар аударды», - деп атап өтті Ақорда.
Астана әкімі Б.Сұлтанов Мемлекет басшысына елордада әлеуметтік, коммерциялық, әкімшілік және тұрғын үй нысандарын салудың жоспарлары туралы мәлімдеп, қала инфрақұрылымын дамытудың перспективалары жөнінде баяндады. Қала басшылығының ақпаратына сәйкес, жыл басынан бері елордада 1,7 миллион шаршы метр тұрғын үй пайдалануға берілген және жыл соңына дейін тағы да 2,3 миллион шаршы метр тұрғын үй салу жоспарланып отыр.


Жаңалықтармен бөлісу: