Назарбаев Теміртау мен «АМТ» жағдайын үнемі бақылауда ұстайтынын атап өтті

Күні: 15:31, 07-09-2018.

Астана. 7 қыркүйек. ҚазТАГ – Қазақстан Президенті  Нұрсұлтан Назарбаев өзінің Теміртауға (Қарағанды облысы) барған сапарында «АрселорМиттал Теміртау» акционерлік қоғамына барды, деп хабарлады мемлекет басшысының баспасөз қызметінен.  
«Нұрсұлтан Назарбаев қара металл прокатын шығаратын Қарағанды облысындағы ірі кәсіпорындардың бірін аралап көрді. Елбасы сұрыпты прокат өндіру технологиясымен және металлургия комбинатын одан әрі дамыту жоспарымен танысты», - делінген жұмада Ақорда сайтында жарияланған хабарда.  
Сонымен қатар, Мемлекет басшысына ЖЭО-1 және ЖЭО-2 орталықтарын қайта жөндеу жоспары, сондай-ақ өңірдің экологиялық қауіпсіздігін қамтамасыз етуге қатысты шешімдер туралы баяндалды.
Елбасы кәсіпорынның еңбеккерлерімен кездесіп, әңгімелесті.
«Қазір зауыт аумағында бойымды ерекше бір сезім баурап алды. Мен мұнда алғаш рет 1958 жылы кірген едім. Ол кезде бұл жерде ештеңе болған жоқ. Барлығы менің көз алдымда салынды», - деп бөлісті естеліктерімен Қазақстан президенті.  
Нұрсұлтан Назарбаев комбинат металлургтары мен еңбеккерлерінің жұмысы ауыр екенін атап өтіп, Теміртау қаласы мен зауытқа қатысты жағдайды үнемі өз бақылауында ұстайтынын айтты.
Әңгіме барысында Елбасы компания басшылығына қала тұрғындарының тұрмысын жақсарту жолында бизнестің әлеуметтік жауапкершілігі зор екенін ескертті. Атап айтқанда, Мемлекет басшысы қалада медициналық, білім беру және спорт нысандарының санын көбейту қажеттігін атап өтті.
Зауыттың еңбек ұжымы өкілдері Қазақстан Президентінің бастамаларына және елімізде жүзеге асырылып жатқан мемлекеттік бағдарламаларға қолдау білдіретіндерін жеткізді.


Жаңалықтармен бөлісу: