ОҚО Сайрам ауданында екі жаңа мектеп ашылды

Күні: 14:14, 13-11-2014.

Шымкент. 13 қараша. ҚазТАГ – Оңтүстік Қазақстан облысы Сайрам ауданында екі жаңа мектеп ашылды, деп хабарлады облыстық әкімдіктің баспасөз қызметі.
«Көлкент ауылында 200 орындық мектеп ашылды. Оған Қ. Жандарбековтың есімі берілді. Мектептің құны 387,149 млн теңге, қаржыландыру аудандық бюджеттен болды», - деді баспасөз қызметінен бейсенбіде.
Мектептің соңғы стандарттар бойынша барлық қажетті заттармен жарақталғаны, онда физика мен химияның жабдықталған кабинеттері, спортзал, асхана бар екені атап өтілген. Бұрын оқушылар сонау 1970-жылдарда салынған шағын бейімделген ғимаратта оқып келген.
Сондай-ақ Әйтеке би ауылында апаттық мектептің орнына жаңасы салынды. Онда 250 бала білім ала алады. Мектеп құрылысы облыс бюджетіне Т408,688 млн-ға шықты. Мектепті 2015 жылы пайдалануға беру жоспарланған, бірақ мердігерлер құрылысты мерзімінен бұрын бітірген.
Сайрам ауданының әкімі Уәлихан Қайназаровтың айтуынша, осы күнге дейін ауданда 3 апаттық мектеп болған. Әйтеке би ауылындағы проблеманы шешіп үлгерген. Қазіргі таңда Манкенттегі апаттық мектептің орнына 600 орындық жаңасын тұрғызу жүріп жатыр, оны келесі жылы пайдалануға тапсырады. Одан өзге, 2016 жылы Манкент ауылдық округіндегі Мұзрапов атындағы мектеп құрылысын аяқтауға уәде берілді.


Жаңалықтармен бөлісу: