Тәуелсіздік пен ел аумағының тұтастығын қорғау Қарулы Күштердің басты міндеті - Тоқаев–

Күні: 19:02, 03-05-2019.

Астана. 3 мамыр. ҚазТАГ - Қарулы Күштердің басты міндеті – Тәуелсіздік пен ел аумағының тұтастығын қорғау, деп мәлімдеді Қазақстан президенті - Қарулы күштерінің жоғары бас қолбасшысы Қасым-Жомарт Тоқаев.
«Қарулы Күштердің басты міндеті – Тәуелсіздік пен ел аумағының тұтастығын қорғау. Мемлекеттің сенімді қалқаны әрі тірегі саналатын Қазақстан армиясы – күшті әрі мобильді. Бүгін сіздер тәуелсіз Қазақстанның Қарулы Күштерінің қуатын көрсеттіңіздер. Әскери бөлімшелер кәсіби дағдылары мен жауынгерлік рухын іс жүзінде дәлелдеді», - деп келтіреді Ақорда жұма күні «Көктал» полигонындағы «Айбалта-2019» стратегиялық командалық-штабтық оқу жаттығуы барысында Тоқаевтың сөзін.
Жоғарғы Бас қолбасшы әскерилерді оқу-жаттығуды табысты аяқтауымен, сондай-ақ, алдағы Отан қорғаушылар күні және Жеңіс күні мерекелерімен құттықтап, қызметтеріне табыс тіледі.
Сонымен қатар, мемлекет басшысына «Айбалта-2019» командалық-штабтық оқу-жаттығуының негізгі кезеңдері мен міндеттері туралы баяндалды. Оқу-жаттығу барысында шартты қарсыласты жою кезіндегі Қарулы Күштердің мүмкіндіктері көрсетілді.
Оған қоса, Қазақстан Президенті командалық пунктке барып, әскери техникалар мен қару-жарақ үлгілерін, инфрақұрылымдық нысандарды, соның ішінде модульді жылжымалы госпитальді, механикаландырылған нан зауытын, азық-түлік қоймасын, пилотсыз ұшатын аппараттарды басқару пунктін аралап көрді.
Мемлекет басшысы далаға тігілген әскери лагерьге барып, «солдат ботқасынан» дәм татты, қатардағы сарбаздармен әңгімелесті.
Еске салсақ, 17 сәуірде Қазақстанда «Айбалта-2019» стратегиялық командалық-штабтық оқу-жаттығуы басталды.


Жаңалықтармен бөлісу: