Астана. 3 тамыз. ҚазТАГ – Президент Қасым-Жомарт Тоқаев танымал қоғам қайраткері, эколог, экономика ғылымдарының докторы Салтанат Темірқұлқызы Рахымбекованың дүниеден өтуіне байланысты оның жұбайы, «Ұлттық аграрлық ғылыми-білім беру орталығы» коммерциялық емес акционерлік қоғамының басқарма төрағасы Төлеутай Рахымбековке және отбасы мен жақындарына көңіл айтып, жеделхат жолдады, деп хабарлады Ақорда.
«Салтанат Темірқұлқызы әр жылдары қоршаған ортаны қорғау, тұрғын үй-коммуналдық шаруашылығы саласын жетілдіру, сондай-ақ, «Жасыл» экономиканы дамыту бағытында көп іс атқарды. Қазақстанның кәсіпкер әйелдері одағының тең төрайымы, Қазақстан Азаматтық альянсының президенті болып, еліміздегі саяси-қоғамдық жұмыстарға белсенді атсалысты. Марқұмның жаны жәннатта, иманы саламат болсын», - делінген дүйсенбіде марқұмның жақындары мен отбасына жолданған жеделхатта.
Бұған дейін хабарланғандай, пневмониядан Қазақстанның Азаматтық альянсының президенті Салтанат Рахымбекова қайтыс болған еді.
Тоқаев белгілі қоғам қайраткері Салтанат Рахымбекованың отбасына көңіл айтты
