Түркістан. 27 қыркүйек. ҚазТАГ – Қасым Жомарт Тоқаевтың есептеуінше, президенттің бір ғана мерзімге сайлануы - демократияға апаратын батыл қадам.
«Тағы бір аса маңызды реформа – Президенттің бір ғана мерзімге сайлануы. Біздің аймақтағы қай мемлекетті алып қарасаңыз да, мұндай өзгеріс мүлдем болмаған. Сондықтан бұл реформа демократия жолындағы батыл қадам деп сенемін. Тәуекелге бел бусақ та, осындай шешім халқымыздың жарқын болашағы үшін керек деп кәміл сенемін. Бұл реформа не үшін жасалмақшы деген сұрақ пайда болуы мүмкін. Мәселе мынада: Президенттік лауазымға көп жыл бойы бір ғана адам ие болмауы керек. Әлемде болсын, біздің елімізде болсын көп жыл бойы бір ғана адам ең жоғары лауазымға ие болса, мұндай жағдай елге де, Мемлекет басшысына да абырой әкелмейді», - деп мәлімдеді Тоқаев сейсенбідегі Түркістан облысына жұмыс сапары барысында.
Президенттің есептеуінше, болашаққа нық сеніммен қарап, адал, дарынды саясаткерлерге жол ашуымыз керек.
«Жалпы, жұрт біздің саяси жүйені өзгерту туралы жоспарымыздың мән-маңызын жақсы түсініп отыр. Жұмысты одан әрі жалғастыру үшін жаңа Конституцияға сай сенім мандаты қажет. Сондықтан кезектен тыс Президент сайлауы биылғы 20 қарашаға белгіленді. Біз бұл науқанды заңға сәйкес, әділ және ашық өткіземіз. Түркістандықтар да сайлауға белсене қатысып, өз таңдауын жасайды деп сенемін», – деді Қасым-Жомарт Тоқаев.
Тоқаев: Президенттің бір ғана мерзімге сайлануы - демократияға апаратын батыл қадам
