Астана. 29 маусым. ҚазТАГ-Қасым-Жомарт Тоқаев Түрікменстан Президенті Сердар Бердімұхамедовпен кездесті, деп хабарлады Ақорданың баспасөз қызметі.
"Тоқаев түрікмен әріптесіне дәстүрлі қонақжайлылығы үшін алғыс айтты. Бұл Сердар Бердімұхамедов Түрікменстан президенті болып сайланғаннан кейінгі жоғары деңгейдегі алғашқы кездесу болғандықтан, Қасым-Жомарт Тоқаев оны сайлаудағы жеңісімен құттықтады", - делінген сәрсенбі күнгі хабарламада.
Тоқаев Ашхабад саммитінің ерекше маңыздылығын атап өтті. Ол іс-шараның қорытындылары Каспий маңы елдерінің достығы мен тату көршілігін нығайтуға ықпал ететініне және олардың өзара тиімді ынтымақтастығының жаңа көкжиектерін анықтайтынына сенім білдірді.
Түрікменстан Президенті өз кезегінде Қасым-Жомарт Тоқаевқа шақыруды қабылдап, Ашхабадқа келгені үшін ризашылығын білдірді. Саммиттің күн тәртібі туралы айта отырып, Сердар Бердімұхамедов форумның қорытындылары Каспий өңірінің игілігі үшін қызмет етеді деген пікір білдірді.
Тоқаев Түрікменстан Президентімен кездесті
