Алматы. 29 сәуір. ҚазТАГ – Валентина Владимирская. Цифрлық даму, инновациялар және аэроғарыш өнеркәсібі вице-министрі Дмитрий Мун Қазақстанда сарай, монша, жазғы ас үй және басқа да шағын құрылыстарды бұзу процесін жеңілдету ұсынды.
«Біз мұндай нысандарды (сарайлар, моншалар, күркелер, жазғы ас үйлер – КазТАГ) бұзу үшін жеке рұқсат талап етпеуді ұсынамыз, оны қарапайым хабарлама беру тәртібімен алмастырғымыз келеді. Қазір мұндай рұқсат алу үшін азаматтар әртүрлі мекемелерге жеке барып жүруге мәжбүр болса, біз бұл процесті толықтай «Мемлекеттік қала құрылысы кадастры» жүйесі арқылы автоматтандыруды көздеп отырмыз», - деді Мун сейсенбі күні құрылыс саласы мен қала құрылысы кадастрын цифрландыру туралы үкімет отырысында.
Оның айтуынша, бұл бастама қызмет көрсету қадамдарын 87%-ға, ал қажетті құжаттар санын 86%-ға қысқартуға мүмкіндік береді.
Құрылыс саласында жетілдіруді қажет ететін үдерістер бар. Қазіргі таңда құрылыс жұмыстарының әртүрлі кезеңдерінде әртүрлі ақпараттық жүйелер қолданылып, құрылыс құжаттарының сканерленген нұсқалары солар арқылы өтеді.
Сонымен қатар, министрлік құрылыс саласында BIM (Building Information Modeling) технологиясын енгізуді жоспарлап отыр. Бұл технология ғимараттың барлық элементтерін қамтитын 3D-модель құру арқылы жобалау мен құрылыс кезеңдерінде қателіктерді алдын ала анықтап, түзетуге, жобалау және құрылыс мерзімдерін 25%-ға дейін қысқартуға, шығындарды 10%-дан астамға азайтуға және ғимараттарды пайдалану шығындарын 15%-ға дейін төмендетуге көмектеседі.
ЦДИАӨМ Қазақстанда сарайлар мен моншаларды бұзу тәртібін жеңілдетуді ұсынуда
