Астана. 15 тамыз. ҚазТАГ – Спортшылардың көбінен коронавирус инфекциясы анықталуына байланысты олардың Қазақстан президенті Қасым-Жомарт Тоқаевпен кездесуі кейінге шегерілді, деп хабарлады агенттік тілшісі.
«Өздеріңізге белгілі, президент кеше Париж Олимпиадасының жүлдегерлері мен бапкерлер құрамын мемлекеттік наградалармен марапаттау туралы Жарлыққа қол қойды. Қасым-Жомарт Кемелұлы Ұлттық құрама мүшелерімен сол күні кездеседі деп жоспарланған болатын. Өкінішке қарай, атлеттер мен жаттықтырушылардың жартысынан коронавирус инфекциясы анықталды. Сол себепті кездесу кейінге шегерілді. Спортшылар мен бапкерлердің тезірек сауығып кетуіне тілектеспіз», - деп хабарлады ҚазТАГ редакциясына бейсенбі күні ҚР президентінің баспасөз хатшысы Берік Уәли.
Ол мемлекет басшысының Олимпиада жүлдегерлерін міндетті түрде қабылдайтынын атап өтті. Кездесу тамыз айының соңында Ақордада өтеді деп жоспарлануда.
Жаппай ковид анықталуына байланысты Тоқаевтың олимпиадаға қатысушылармен кездесуі кейінге шегерілді
