"Қазақстан Республикасының Бас прокуратурасы 2022 жылғы қаңтардағы оқиғаларға байланысты қылмыстық істерді тергеуді жалғастырып жатыр. Биыл 29 сәуірде ауыр зардаптарға әкеп соққан билік пен лауазымдық өкілеттіктерді асыра пайдаланғаны үшін (ҚК-нің 362-бабы 4-бөлігі) Қазақстан Республикасының Қылмыстық іс жүргізу кодексінің 128-бабы тәртібінде ішкі істер экс-министрі Ерлан Тұрғымбаев ұсталды. Қылмыстық істе мемлекеттік құпия бар болғандықтан, сотқа дейінгі тергеп-тексерудің басқа деректері жария етуге жатпайды", - деп хабарлады Бас прокуратура сейсенбі күні.
Тұрғымбаевтың ұсталғаны туралы 29 сәуірде белгілі болды.
Еске салсақ, бас прокуратураның 20 наурыздағы мәліметі бойынша, жүргізіліп жатқан тергеп-тексерулер барысында Ішкі істер экс-министрі Тұрғымбаевтан да жауап алынған.
Ерлан Тұрғымбаев ішкі істер министрі қызметін 2019 жылдан бастап атқарған, 2022 жылғы 25 ақпанда қаңтар оқиғасынан кейін ІІМ басшысы қызметінен босатылды.
Фото көзі: gov.kz