Өскемен. 19 тамыз. ҚазТАГ – Өскеменге есірткінің 8 мың дозасын кіргізбек болған ұйымдасқан қылмыстық топ мүшелері ұсталды, деп хабарлады ШҚО полиция департаментінің (ПД) баспасөз қызметі.
«ШҚО Полиция департаменті баспасөз қызметінің мәліметіне сүйенсек, полиция қызметкерлері Ұлттық Ұланның сарбаздарымен бірлесіп, өңір аумағына есірткі жеткізумен айналысқан қылмыстық топтың жолын кесу бойынша арнайы операция өткізді. Нәтижесінде, синтетикалық есірткінің аса ірі партиясын, нақты айтқанда 3,5 мың бірреттік дозасын Өскемен қаласына әкелмек болған Алматы қаласының 35 жастағы тұрғыны ұсталды»,-делінген жұма күні таратылған хабарламада.
Ұстау барысында автокөлікте онымен бірге жұбайы да отырған. Белгілі болғандай, ер адам күдікке ілінбес үшін зайыбын өзімен бірге әдейі жолға ала шыққан.
«Біраз уақыттан соң қылмыстық топтың екінші мүшесі де қолға түсті. Ұсталған 29 жастағы ер адамнан 2 мың дозаға тең 600 грамм синтетикалық есірткі тәркіленді. Есірткі арнасын жою бойынша арнайы операция Өскеменге арнайы келген Ақтөбе қаласының 24 жастағы тұрғынын ұстаумен аяқталды. Тінту барысында, одан құрамында 0,5 кг-нан астам «альфа-PVP» психотроптық сұйықтығы бар 5 пластикалық ыдыс тәркіленді»,- деп мәлімдеді құқық қорғау органдары.
Оларға қатысты ҚР ҚК-нің 297-бабы 3-бөлігі бойынша сотқа дейінгі тергеу амалдары жүргізілуде.
«Қабылданған шаралар нәтижесінде, Өскемен қаласына шамамен мөлшері 8 мың бір реттік есірткі дозасын жеткізудің арнасы жойылды. Оның «қара нарықтағы» құны шамамен 65 млн теңгеден асады», - деді облыстық ПД бастығының орынбасары Талғат Шаяхметов.
Өскеменге есірткінің 8 мың дозасын кіргізбек болған ұйымдасқан қылмыстық топ мүшелері ұсталды
