Тоқаевқа болашақта Қазақстанда Мәдениет жылы деп жариялау ұсынылды

Күні: 14:43, 22-08-2019.

Астана. 22 тамыз. ҚазТАГ - Қазақстан Президенті Қасым-Жомарт Тоқаевқа елімізде Мәдениет жылы деп жариялау ұсынылды, деп хабарлады мемлекет басшысының баспасөз қызметі.
«Мемлекет басшысы Қасым-Жомарт Тоқаев Қ.Қуанышбаев атындағы қазақ драма театрының көркемдік жетекшісі Талғат Теменовті қабылдады. Кездесу барысында еліміздегі театр өнерін дамыту мәселелері талқыланды», - делінген бейсенбідегі Ақорданың таратқан хабарында.
Қасым-Жомарт Тоқаевқа елордадағы Қазақ мемлекеттік академиялық музыкалық драма театрының жаңа ғимаратын салу жұмыстары бойынша ақпарат берілді.
Белгілі театр және кино режиссері Талғат Теменов болашақта мәдениет жылын жариялау, жас актерлердің әлеуметтік жағдайын жақсарту, баспанамен қамту мәселелері бойынша бірқатар ұсыныстар айтты.
Президент Қасым-Жомарт Тоқаев халықтың рухани сұранысын қамтамасыз етуде өнердің, соның ішінде театрдың маңызын атап өтіп, алдағы уақытта мәдениетке, театр мен киноға мемлекет тарапынан тиісті деңгейде көңіл бөлу жалғаса беретінін айтты.
Еске салайық, 12 наурызда Қазақстан Республикасы Үкіметінің қаулысымен «Самұрық-Қазына» ҰӘҚ» АҚ-на Астанадағы қазақ драма театрының құрылысын қаржыландыруға тапсырма берілді. Бұл хабар әлеуметтік желілерде аралас пікірлер тудырды.
14 наурызда Астанада 2019 жылдың 18 маусымы мен 2020 жылдың 18 маусымы аралығында жалпы ауданы 6 гектар болатын 47 жер учаскесін мемлекет мұқтажы үшін алып қою, оның ішінде сатып алу арқылы алу жоспарланып отырғаны белгілі болды. Бұл жерлерде Қаздрамтеатрдың жаңа ғимараты салынады. Жер учаскелері Астана қаласының Алматы ауданында, № 23-15 (жобалық атауы) көшесінде, А.Байтұрсынұлы мен Ж. Нәжімеденов көшелерінің арасында орналасқан.
29 наурызда Қазақстан Республикасы Мәдениет және спорт министрлігінде (ISS) Астанадағы қазақ драма театрының жаңа ғимаратының салынуы көрермендер залының тарлығымен түсіндірілді.


Жаңалықтармен бөлісу: