«Бүгін Бас прокуратура мен Интерпол қызметкерлері Сыртқы істер министрлігінің көмегімен Украинадан аса ірі көлемде алаяқтық жасағаны үшін күдіктіні қылмыстық жауапкершілікке тарту мақсатында экстрадициялады. Ол 2017-2019 жылдар аралығында Алматыда салынып жатқан үйден пәтер беремін деген желеумен азаматтардың 140 млн теңгеден астам қаражатын алдау жолымен иемденген»,- делінген жұма күнгі хабарламада.
Ведомство өкілдерінің мәліметінше, қылмыс жасағаннан кейін күдікті жасырынып кеткендіктен, оған халықаралық іздеу жарияланды.
«Өткен жылдың қарашасында күдікті Украина аумағында ұсталған. Қазақстан Бас прокуратурасының өтініші бойынша украиндық тарап күдіктіні елімізге экстрадициялау туралы шешім қабылдады. Айта кетсек, былтыр Украинаның қылмыскерлерді экстрадициялау мәселелері бойынша Қазақстан-Украина өзара іс-қимылын реттеген Минск конвенциясынан шыққанына қарамастан, аталған адамды ұстап беру Қазақстан Республикасы мен Украина арасындағы 2018 жылы Қазақстан Бас прокуратурасы жасаған экстрадициялау туралы шарттың арқасында мүмкін болды. Сонымен қатар, Астана мен Киев арасында тікелей әуе қатынасы болмағандықтан, іздеуде жүрген адамды Украинадан Молдова мен Түркия арқылы өткізуге тура келді»,- делінген хабарламада.
Қазір ол Астана қаласындағы тергеу изоляторына қамалды.
«Тағылған айып бойынша күдіктінің мүлкі тәркіленіп, бес жылдан он жылға дейінгі мерзімге бас бостандығынан айыру түріндегі жаза қарастырылған»,- деп мәлімдеді бас прокуратура.
Фото көзі: Пресс-служба ГП РК.